33/10 - Statsbudsjettets omtale av viktige USS saker

Rovvilt

Regjeringa ynskjer ei forsterking av overvakinga og bestandsregistreringa av rovdyr, og det skal leggjast ytterlegare til rette for lokal deltaking i bestandsregistreringa. Dette skal skje ved opprettinga av ROVDATA, som får ansvaret for formidling, drift og utvikling av det nasjonale overvakingsprogrammet for rovvilt.

Samla løyvingar til rovdyrerstatninga aukar med 19 millionar kroner i 2011, i hovudsak som fylgje av auka erstatningsutbetalingar i 2009.

Ei styrking av den lokale deltakinga i bestandsregistreringa er ei sak USS har tatt opp med Regjeringa ved fleire høve. USS er difor positive til at Regjeringa ynskjer å leggje større vekt på dette, og meiner det kan bidra til å betre dialogen mellom lokalmiljøa og miljøforvaltninga i rovviltspørsmål. USS er likevel kritiske til at midlane til andre førebyggjande tiltak er redusert. USS vil fortsetje å fylgje opp Regjeringa sitt arbeid på dette området.

Naturmangfald, lokal forvaltning og skjøtsel i verneområde

Satsinga på naturmangfald held fram og i statsbudsjettet er det lova ein auke på 80 millionar kroner til dette arbeidet. Tilskota til forvaltning av verneområda får ein auke på om lag 20 millionar kroner i 2011. Ein stor del av auken er retta mot etableringa av ny modell for forvaltning og skjøtsel av verneområda, inkludert nye naturoppsynsstillingar, områdeforvaltarar og drift av nasjonalparkstyra. Av dette går mellom anna 7 millionar til Statens Naturoppsyn (SNO) til oppretting av nye naturoppsynsstillingar, styrka tiltak i nasjonalparkane og skjøtselstiltak i verneområde. 10 millionar går til Direktoratet for Naturforvaltning, til nye stillingar som områdeforvaltarar.

USS er er positive til at Regjeringa fylgjer opp den nye forvaltningsmodellen med auka tilskot, men stiller spørsmål om det vil bli noko att av dei auka midlane til den lokale forvaltninga. Det er nødvendig at dei lokale forvaltningsorgana får tilstrekkeleg med midlar som dei sjølve kan disponere til forvaltningsoppgåvene i verneområda. Etter USS sitt syn burde deler av midlane som i dag går til dei statlege organa, bli tildelt dei lokale forvaltningsorgana.

INON

Når det gjeld INON-områda vart det lagt fram ein rapport i mai 2010 om ”Skogsveibygging og hensynet til inngrepsfrie naturområder i Noreg (INON)” frå Direktoratet for naturforvaltning og Statens landbruksforvaltning. Regjeringa varslar i statsbudsjettet at Landbruks- og matdepartementet, i samarbeid med Miljøverndepartementet, vil gjennomføre ein revisjon av regelverket knytt til landbruksvegar i løpet av hausten og vinteren 2010 -2011.

Prioriterte artar og utvalde naturtypar

Arbeidet med prioriterte artar og utvalde naturtypar får ein auke på statsbudsjettet med 10 millionar kroner.

Her kan du laste ned Prp 1 S 2010 - 2011 for Miljøverndepartementet og Landbruks- og matdepartementet.